Torniossa olit suviseurat 1-4 jyyliä 2016. Oli roikkaa kauasmaita myöten ja semmonen puhheensorina ettei paremasta väliä. Se liehto melkosesti ja 19 maan flaut heiluit tuulessa. Valitettavasti mie en nähny Meänmaan flakua vielä tänä vuona. Tiä kunka ussein se Suomen puolela veethään salkhoon. Mutta kuiten mie ilostuin, ko mie kuulin, kunka se kuuluttajapoika sano: ”Nyt laulethaan Sionin laulu kaks sattaa kuus.” Poika puhu sen seun ommaa kieltä, ihan selvää meänkieltä. Siittä oli moni hyvilhään, etelän roikkaki.
Ko mie menin sapuskaa osthaan, niin minula oli prupleemi, ko kontantit olit kaikkityyni pörsistä. Mie hunteerasin, ette kunkas mie nyt maksan minun poronlihavellin. Ei hättää. Tämä kyltti tuli minule aphuun. Sollu ko kaivaa framile pankokortti ja maksaa ja sitte syä sitä makusaa velliä.
Ko kahenkymmenen vuen päästä taas oon Suviseurat Torniossa, niin mie luulen, ette sielä joku saarna piethään meänkielelä elikä tulkathaan meänkielele.
Kirsti Johansson
Foto: Mari Johansson