Kaalamaa, Kaalamaa, vastaa!

KAALAMAA

Kirunaruottalaisten muistoa kunnioittaen!
Kirunan kulttuurijohtajalle ja Meän Pravdale!

Kontatkaa Kaalamaahan,
antakaa Alice Eriksson Kallan näyttää polkua,
Anna Ahmatovan laulaa Kaalamaastaki
Pajalan pohjospuolela olevasta häpeästä!
Kontatkaa polkua pitkin sirpilä ja vasaralla
koristetulle monumentile.
Itkekää kasuvet veristä maata vasten,
suuelkaa miesten ja vaimojen,
lasten ja torpparien jalanjäkiä,
Alicen ja Juliuksen, miljoonien muitten
matkala kuolemhaan, perikathoon,
suuelkaa poistuvia jälkiä.
Antakaa suuta!

Hauat täytethään sielä nyt.
Pamjat, joka oon aukassu massahauat
oon fankilassa.
Tet oletta täälä kauon lakasheet ja laasheet
luuala, Gulagissa siotulla.
Kohottakaa teän veriset kätenne
kohin sitä taivasta, jota oletta pilkanheet.
Kynsikää sormenne verhiin
Vasahraan ja sirphiin,
jota nyt nostethaan Ukrainassa.
Komunismin ruumis löyty.
Se oon Kaalamaassa,
lahonu, aatheen haijuveelä parfymeerattu,
vielä se huutaa Kierien
punasilla huuila
pruunila kielelä:
”Älkää moittiko ystävääni Putinia,
joo, olen komunisti, äänestän v:tä.”
Se sannoo ja suutelee
sirppiä ja vasaraa
ruskein kielin punasin huulin.

Kaalamaassa painakaa kasuvet
maata vasten,
vertä tippuvat kyntenne
sammalheesheen,
nostakaa veriset kätenne
taivasta kohin,
huutakaa taihvaasta
sovitusvertä,
kynsikää muistomerkin
sirppiä ja vasaraa,
huutakaa äänenne käheäksi,
kurkku suorana,
ette tet ennää saata valehtella
tet Putinin aatekaverit!
Net viuhtova sirppiä ja vasaraa.
Net nostava Leninpatshaat pysthöön
ja tet, valepatit, kolmipäisen hirviön kellokhaat
sanotta sitä fasismiksi,
peittäksenne teän valhetta,
pettääksenne vielä kerran
mutta minua että petä,
tet verisen aatheen palvojat!

En tohi tätäkhään julkasta,
vielä teilä oon valta ja uhka.

 

Jos saisin luvan kertoa – mitä en saa-
mie kertosin ylistyksistä
Putinin esikuvale Stalinille,
mie kertosin Kaalamaan muistomerkistä
ja Ruottin vaikenimiskulttuurista.

Jos saisin luvan kysyä – mie kysysin:
”Mihinkäs katosi 23. elokuuta –
komunismin ja kansalispolsevismin uhrien
muistopiävä?”

Jos saisin luvan nuistuttaa teitä –
mie pyytäsin teitä muisthaan
päivää ko Ribbentrop Moskovassa
tunsi aatheen kaveruutta.

Met sen älyämmä nyt
ko oikeisto ja vasemisto
istuva sökölä ja sekottava sanat
ja kaikin oon gnostikkoja,
komunistia ja kansalispolsua Putinia
sanothaan täälä fasistiksi ja nasitsiksi
ja Putin jahtaa lännessä fasistia ja nasistia.

Mie vaain ko Magna charta sanat takasi!
Mie vaain sanojen merkityksen takasi!

Sököpöytä kiini ja äkkiä!
Sökö sökö sökö söö!

Järki tjöh. Ymmärys kom!

 

 

Kaalamaa, Kaalamaa, vastaa!
Kiruna, Kiruna, vastaa!
Pentäsjärvi, Pentäsjärvi, vastaa!
Kaunisvaara, Kaunisvaara, vastaa!

Pajala, Pajala, vastaa!
Luulaja, Luulaja vastaa!

(V)astaa, (V)astaa!

13.4. 2022

Kategoria(t): Dikter/Runoja. Lisää kestolinkki kirjanmerkkeihisi.