Yks sykiatrikkeri kerto mulle, ette hään kerran kysy yheltä mieheltä miksi hään jakso niin huonosti. Se sano, ette kranni oli hältä varastannu miljoonan. Mie hämmästyin ja kysyin oliko hällä ollu niin paljon. Se sano, ette ”jos olis ollu!”
Mie kerroin sykiatrikkerille, ette yks poika tuli minun tykö ko mie olin opintorektorinna, se sano ette klossit olit häntä uittanheet kinoksessa. Mie hämmästyin ja kattoin klasista ulos ja sanoin, etteihään nyt ole lunta. Se sano, ette ”jos olis ollu”.
Luen ja kuulen ko moni sannoo, ette hältä oon viety kieli. Multaki piiain olis viety jos mulla ei olis ollu, mutta mie piilotin sen omilta herroilta ja herrattarilta ja pörrö menin 20 vuotta aikaa saarnaahmaan Pajalan kirkossa meänkielelä, väkeä paljon, ja silloin yks pappi sano TV-debatissa ette se oli ”jippu”, sitte se sai korkean viran ja suuret rahat tutkimalla kunka kieltä oli sorrettu ja olletikki varastettu. Omat jippupuhheet se tieten unohti raportissa ja minun kans se ei istu samassa huohneessa. Mie menin ja muistitin sitä siittä jipusta ja joistaki muista aroista asioista.