Meänmaa 2015 tullee kahtena erilisenä avisinna. Tämä muutos johtuu siittä, ette met missasimma hakea rahoja vuele 2015. Niin met Meänmaan föreninkissä hunteerasimma mitä tehä. Jos met heitämä julkasemasta Meänmaata, ainua korkean tason avisi saattaa mennä hauthaan. Siksi met päätimä julkasta kaks tuplanumeroa, jokka samala saattava olla antoliikiitä. Sen lisäksi Hannu Töyrylä ehotti, ette alkasimma tekheen verkkoavisia. Met päätimä freistata ja niin synty uusi nettiavisi, jolle met annoima nmimeksi Tiuku. Meänmaa oon freistanu julkasta meänkielistä tekstiä ja taso oon niin korkea, ette Meänmaa ei koskhaan tule jouthuun häkkilintuhäkin pohjapaperiksi.
Ko mie olin lapsena kuulin puhuttavan avisista ja kirjoista. En muista, ette Haaparannanlehteä, Norlänskaa ja Kyririä sanothiin päivälehiksi. Haaparannanlehteä sanothiin Präiskäksi ko sillä saatto tappaa kärpäsiä. Muita avisia kuttuthiin vain nimelä, samala mallila ko Fintys oli marmelaati. Viikkolehtiä ja aikakauslehtiä sanothiin kirjoiksi.
Meänmaa oon kirja. Meänmaassa oon aina ollu kirjoja ruottiksi ja suomeksi niinku Snelli kirjottaa artikkelissä ”Kultturiasia”. Kirjat oon kuljettanheet monikielistä sivistystä sukupolvesta toisheen.
Nykyaijan metia oon kovin hengästynny. Se halvaa olla paikanpäälä jo varttia vaile tapahtumaa. Uutinen tullee ja uutinen mennee.
Meänmaa uskoo lujasti siihen, ette kirjalisuus pyssyy uutisenna kauon, jopa vuosisatoja. Meänkieliset kirjailijat, kirjottajat ja priimustajat tartteva oman juovan. Meänmaa oon se juova. Samala ko se aukasee Meänmaan omile nuorile, raahvaile ja vanheentuville juovaa, jota kautta saattaa kuljettaa sivistystä aijan virtaa myöten, se pränttää käänettyä tekstiä kans, likeltä ja Kauasmaasta.
Kukkakaupoissa käärithään kukkia avishiin ja joila oon häkkilinnut, net tartteva imevää avisipaperia häkkilintuhäkin pohjale. Meänmaa panhaan kirjahylhyyn. Sieltä se otethaan monta kertaa ja luethaan.
Ko siirythään otethaan Meänmaa myötä. Se tietää sitä, ette Meänmaan sivistys oon följyssä Kauasmaahan ja uutheen asunthoon omassa maassa ja omila tienoila.