Raatiu Väylänranta perustethiin kevväilä 2013. Marsissa jo lähätethiin pruuvilähätystä ja Hilja Byströmin päivänä koko päivän ohjelman suorana Mataringista. 2013 aikana raatiula oli monta avustajjaa jokka tehit prukrammia. Joka viikko tuli jotaki uutta. Sen jälkheen paljon vähemän.
Nyt näyttää ettei kannatte pittää päivittäistä lähätystä toiminnassa. Uusia prukrammia ei juuri tule. Raatiussa pyörii nyt vieläki jouluprukrammit, olis häätyny vaihettaa muuta tilale mutta sekin oon iso työ.
Tämä meinaa ette lähiaikoina päivittäinen aikataulun mukhaan pyörivä lähätys päättyy. Arkiivi jää toimimhaan eli sielä olevia prukrammia mennee kuunela oman valinan jälkheen. Arkiivhiin saatethaan lisätäkki prukrammia ko vain joku tekkee. Tämän menneeki aatela niin ette Väylänranta keskittyy nyt prukrammiarkiiviksi.
Alkuaikoina oli aatosta ette ko nettiraatiussa oon vapaata tillaa 24 tiimaa joka päivä, niin Väylänranta saattais olla kaikitten meänkielisten ja kveenittenki yhtheinen nettiraatiu. Asia freistathiin ottaa tämän framile föreeninkitten yhtheistyökokkouksessa aprilissa 2013, mutta se jäi flakuasian jalkhoin. ”Freistasimma yksin, hyvä soon ette ees näin kauon jaksoimma”.